كم تقضي من عمرك جوا السيارة ؟


كنت في نقاش مع أحد الزملاء أمس عن موضوع زحمة الرياض و ما أدراك ما زحمة الرياض

الوضع فعليا صاير لا يطاق .. و المشكلة ان المسؤولين عن التطوير مو مستوعبين أبعاد الموضوع ، أبعاده النفسية على الناس ، أبعاده على كفاءة أداء الموظفين ، ابعاده على السلامة المرورية . و الإجراءات المتخذه ما تتعدى كونها إجراءات “ترقيع” ! مو التعداد الأخير وضح انه اكثر من ثلث الشعب أعمارهم اقل من 18 سنة ؟ يعني ثلث الشعب راح يسوق خلال الكم سنة الجاية هذا غير الوافدين الي في تزايد و نزوح أهل القرى و الهجر للرياض ، موضوع طويل و انا افكر اسوي تدوينة كاملة عن حلولكم لمسألة الزحمة يمكن نطلع منها بقائمة مقترحات نسلمها للمسؤولين و ينفذون منها شيء . المهم .. بما انه حل على المدى القريب ما اظن بنشوفه ، كنت في نقاشي مع زميلي نتكلم عن فكرة أن الشخص يتنازل عن حقه في قيادة السيارة المكفول له بحكم انه “ولد !!” و يسلم الحق هذا للسواق ، مثله مثل خواتنا “البنات” !

I Do .. Swap ?

يعني بالعربي الفكرة انك تريح راسك و تخلي السواق يوديك و يجيبك لمشاوريك الرئيسية مثل العمل و انت ترتاح جنبه و تقرأ لك جريدة أو كتاب خلال هالساعة (أو أكثر !)

سواء كان سواق الأهل ، أو سواق خاص ، و بسيارتك او بسيارة إضافية ، تفاصيل الفكرة ما يهمني مناقشتها ، بس الفكرة بحد ذاتها ايش تشوفونها ، عيب ؟ و الا عادي ؟ الي بيسأل ليش عيب انا اقول لك اراء بعض الناس الي استعيبوا الفكرة ، يقولون ان فكرة سواق يسوق فيك بتحسس الناس انك متكبر او متعجرف ، او ممكن يفكرون ان عندك مشكلة صحية أو إعاقة من ناحية ثانية ، البعض يقول الناس بيقولون : يا ساتر وش هالدلع و “الخكرنه” (من خكري) !

بس الي يشوفون انها أمر عادي و فكرة حلوه ، مبدأهم ان الإنسان في هالزمن الزم ما عليه نفسيته و المحافظة على مستوى انتاجيته في العمل و الغاء أي شي ممكن يؤثر على انتباهة او تركيزه او علاقاته بالناس خلال اليوم ، و بنفس الوقت العصر الآن تغير ، الدقيقه صار لها معنى فما بالك بمعدل ساعة و نص الى ساعتين الواحد يقضيهم يوميا محبوس جوا السيارة !

ما كنت راح اطرح التدوينة لو كان الموضوع مجرد نقاش عابر مع زميل .. بس لأني سمعت و في مناسبات مختلفة أكثر من شخص نفذ هالفكرة  ، أحد زملائي يحكي لي عن شخص يعرفه يقول : “زميلي متزوج حديثا ، ما عنده اولاد ،كان معاه سيارة جيب خاصة فيه، باعها و اشترا سيارة عائلية تويوتا و جاب سواق .. يوميا يركب هو و زوجته ورا ، يوصلهم السواق اشغالهم ، مشوار البيت الى عمل زوجته ياخذ 40 دقيقه ، بعدين من عمل زوجته الى عمله ياخذ 20 الى 30 دقيقه “

يعني هالشخص وفر على نفسه يومياً ساعة كوقت ، و وفر على نفسه ساعة ثانية من الضغط النفسي و العصبي !

نقطة أخيرة ، في أغلب السيارات بتحصل خيار يوضح لك وقت التشغيل ، يعني الوقت الي السياره ظلت فيه في وضع تشغيل من اشتريتها  ، جربت تقرأ الشاشة و تحسب كم يطلع المعدل السنوي ؟ أنا أقول لك : “شهر في السنة” على الأقل ، ايه نعم بتحصل انك تقضي شهر من وقتك في كل سنة جوا السيارة ! مو شهر عادي .. شهر مليان ضغوط نفسيه و نرفزه و مناظر ترفع الضغط ، طيب ليش ؟

هاه ايش رايكم عادي أجيب لي سواق و الا عيب !

‎التعليقات‫:‬ 10 On كم تقضي من عمرك جوا السيارة ؟

  • بالنسبه لي كبنت اعتبرها أكبر نعمه اني اركب ورى ..

    اصعابي ما تتعب من اللي يسقط علينا و لا اللي يجي من اقصى اليمين يبي يلف اقصى اليسار ..

    و بالنسبه للاستفاده من الوقت .. الله يا زين القراءة مع كوب قهوة << غالب كوب القهوة ينكب عليك مع سلاسه شوارعنا وعدم وجود حفر 😉

    بالاضافه اني ما اشيل هم اني القى موقف للسيارة ..فكل اللي اسوية اني اوقف عند الباب و الباقي على السواق :)..

    رأيي فيه مكتب استقدام يمدحونه على طريق الملك فهد ..

    شكرا على التدوينة الرائعة

  • صح زحمة الرياض صايرة شي موطبيعي
    كل مرة احاول اطلع طريق مختصر ومرات انجح ومرات اطيح في اشارة زحمتها اشد .

    كون انك تجيب سواق مافيها شي ابد لاعيبةولاخكرنة ولاشي

    بس اسأل مجرب كوني بنت وكل مشاويري مع السواق
    مو سريعه الطلعه يعني على مايطلع غير وانت توصف له مكان جديد فهم عليك ولامافهم ويا الله :/ غير ان مزاج السواق بيأثر على السواقه ومالك حق تناقشة لانك شايف وضع الشارع

    افضل اسوق انا 🙁

  • فعلاً لا أتذكر عدد الكتب التي قرأتها في السيارة ، وعدد ألغاز السودوكو التي قمت بحلها في السيارة ، والتخطيط لبقية يومي
    المقعد الخلفي رائع ويغني عن متابعة الطريق أو حتى القلق بشأنه.

    مسألة تجيب سواق فهذي تخضع لعدة اعتبارات مثل :
    – هل أزمتك فعلاً تستاهل إنك تدفع حق استقدام سائق ودفع مرتب شهري له ؟
    – في حال استقدمت سائق هل يكون عمله الوحيد إيصالك لعملك ؟

    وهي في النهاية راجعة لك أنت وظروفك ، وبالنسبة لسالفة عيب فـ رضا الناس غاية لا تدرك

  • معاك حق الزحمه لا تطاق أبداً
    أنا من مؤيدي سياقة المرأة للسيارة

    لكن أحياناً في أوقات الزحمه أحمد ربي
    لأني أكون ماسكه كتاب أقرا فيه، أو ماسكه جوالي وأدخل عالمواقع أو أشيك على إيميلي
    الطريق للجامعة مو طويل لكن مع الزحمه ياخذ ساعة إلا ربع
    حلو تقضيها بشي مفيد

    ولو بتسمع كلام الناس عمرك مارح تشتري راحتك
    جب لك سواق =D

  • انا عن نفسي اؤيد وبقوووه لاني عرفت معنى الاستفاده من الوقت في السياره لاني قسمته ،، الروحه للجامعه الصباح قراءه الاذكار .. مراجعه حفظ من القران ،، وحفظ وجهه جديد .. وبالرجعه اسمع شريط لاي محاظره للحين سمعت لل د نجيب الرفاعي و طارق السويدان اغلب محاظراتهم وزودت نفسي بساعه محاظره يوميا يساوي خمس ساعات بالاسبوع تطوير نفس !! اللي يساوي الدورات اللي يندفع فيها الاف ،، وبالنسبه للمشاوير السريعه استغلها اشيك على التويتر والايميل D: والشاب اللي بيوفر لنفسه سواق انا اعتبره مثقف وذكي ^ـ^

  • طيب كلام جميل وحلو
    وصحيح بدل ما تبهدل نفسك وترفع ضغطك من الاخلاق والقرف اللي بيصير في أي زحمة في السعودية, تقرأ لك كتاب او تخلص شغلات جانبيه بدل ما تشغلك بعدين

    جميل

    بس السؤال اللي جا ببالي, بكلامك دا كلو المهم اني انا العربي السعودي ارتاح وانبسط والسواق الاسيوي المسكين طز فيه يرتفع ضغطه او حتى يموت !!

    مستغرب لا اكثر !

  • ‎بينج باك مشروع فكرة : عاصفة ذهنية للأفكار التجارية | مدونة قييكر | Geeker Blog ()

  • ‎بينج باك مشروع فكرة : عاصفة ذهنية للأفكار التجارية | مدونة قييكر | Geeker Blog ()

  • ‎بينج باك عزيزتي المرأة السعودية .. تبين تسوقين مثلاً ؟ | مدونة قييكر | Geeker Blog ()

  • ‎بينج باك عزيزتي المرأة السعودية .. تبين تسوقين مثلاً ؟ | مدونة قييكر | Geeker Blog ()

‎أضف رد:

‎بريدك الإلكتروني لن يظهر لأحد

‎القائمة الجانبية المتحركة

القليل عني

القليل عني

مرحباً بك في مدونتي الشخصية. أنا ناصر الناصر، مستشار منصات التطوير في شركة مايكروسوفت. مهتم بالتقنية و الإدارة و التبسيط للحد الأدنى Minimalism. أكتب في هذه المدونة عن تقنيات الويب و الحوسبة السحابية، بالإضافة إلى إدارة المنتجات و ريادة الأعمال. أشارك بين الحين و الآخر مراجعاتي الشخصية لبعض المنتجات و الخدمات.

ملفاتي الشخصية